Молитвы родителей за умерших детей (тексты)

Молитва родителей за умерших детей:

Господи, Иисусе Христе, Боже наш Владыко живота и смерти, Утешителю скорбящих! С сокрушенным и умиленным сердцем прибегаю к Тебе и молюся Ти: помяни, Господи, во Царствии Твоем усопшаго раба Твоего, чадо мое (имя), и сотвори ему вечную память. Ты, Владыко живота и смерти, даровал еси мне чадо сие, Твоей же благой и премудрой воле изволися и отьяти е у мене. Буди благословенно имя Твое, Господи. Молю Тя, Судне неба и земли, бесконечною любовию Твоею к нам, грешным, прости усопшему чаду моему вся согрешения его, вольная и невольная, яже словом, яже делом, яже ведением и неведением. Прости, Милостиве, и наша родительская согрешения, да не пребудут они на чадах наших: вем, яко множицею согрешихом пред Тобою, множицею не соблюдохом, не сотворихом, якоже заповедал еси нам. Аще же усопшее чадо наше, нашея или своея ради вины, бяше в житии сем, работая миру и плоти своея, и не паче Тебе, Господу и Богу своему: аще возлюби прелести мира сего, а не паче слово Твое и заповеди Твоя, аще предавшеся сластем житейским, а не паче сокрушению о гресех своих, и в невоздержании бдение, пост и молитву забвению предавше, -молю Тя усердно, прости, преблагий Отче, чаду моему вся таковыя прегрешения его, прости и ослаби, аще и ино злое сотвори в житии сем. Христе Иисусе! Ты воскресил еси дщерь Иаира по вере и молитве отца ея, Ты исцелил еси дщерь жены-хананеянки по вере и прошению матери ея: услыши убо и молитву мою, не презри и моления о чаде моем. Прости, Господи, прости вся согрешения его и, простив и очистив душу его, изми муки вечныя и всели е со всеми святыми Твоими, от века благоугодившими Тебе, идеже несть болезнь, ни печаль, ни воздыхание, но жизнь бесконечная: яко несть человек, иже жив будет и не согрешит, Ты един кроме греха: да егда имаши судити мирови, услышит чадо мое превожделенный глас Твой: Приидите, благословеннии Отца Моего, и наследуйте уготованное вам царствие от сложения мира. Яко Ты еси Отец милостей и щедрот, Ты живот и воскрешение наше и Тебе славу возсылаем со Отцем и Святым Духом ныне и присно и во веки веков. Аминь.

Молитва родителей об усопших детях:

Господи Боже наш, Владыко живота и смерти! Услыши вопль мой, виждь слезы сетующего отца (печалующей матери) о чаде его (ее); приклони ухо Твое к молению моему и услыши смиренную молитву мою и не отрини ю от лица Твоего. Во умилении и сокрушении сердца моего молю Тя, Господи, помяни во Царствии Твоем душу усопшаго (-шия) раба Твоего (рабы Твоея) (шия), и сотвори ему (ей) вечную память. Молю Тя, Господи Боже наш, Твоею беспредельною к нам, грешным, любовию, не по беззакониям нашим воздаждь ему (ей), ниже по грехом нашим сотвори ему (ей), но по благости Своей, по Твоему неизреченному милосердию яви богатую милость в прощении и оставлении грехов усопшему (-шей) рабу Твоему (рабе Твоей), чаду моему (имя), егоже (юже) дал ми еси. Прости ему (ей), Боже, прости, Всещедрый, всякое согрешение вольное и невольное, отпусти ему (ей) все грехи его (ея), от юности содеянные словом или делом, ведением или неведением.

   Вем, Господи, яко множицею согрешихом, неправдовахом пред Тобою, ниже соблюдохом, ниже сотворихом, якоже заповедал еси нам, но молю Тя, прости согрешения наша, очисти беззакония наша, отпусти неправды наши, да не пребудут грехи наши на чадах наших. Аще же чадо мое, отшедшее к Тебе грех ради моих, недостойно суть милости, но достойно Твоего праведного гнева и осуждения, аще моея или своея ради вины не поучашеся в Законе Твоем день и нощь, но бысть в веце сем яко раби мира, работая паче миру и плоти, неже Тебе, Господу и Богу нашему, возлюбив прелести мира сего паче, неже слово Твое и заповеди Твоя, предавашеся сластем житейским, временным паче, неже сокрушению о грехах, и, в невоздержании, бдение, пост и молитву забвению предаваше, темже убо молю Тя прилежно; прости, о Примилосердный Господи, прости отшедшему (-шей) к Тебе рабу Твоему (рабе Твоей) (имя), чаду моему, вся таковая прегрешения, аще в чесом повинен (-на) есть или ино что сотвори в мире сем.

   Господи! Ты воскресил еси дщерь Иаира по вере и молитве отца ея, Ты исцелил дщерь жены хананейской по вере матери ея, молю Тя, Сладчайший Иисусе, приими сице и мою смиренную молитву о чаде моем и избави его (ея) от смерти вечная и исцели душу его (ея) от греховных болезней.
 
   Повергаюся пред Твоею благостию и Твоим милосердием, умоляю Тя, Христе Боже мой, святым Твоим именем, умоляю Тя Твоими дражайшими заслугами искупления, даруй отшедшему (-шей) к Тебе рабу Твоему (рабе Твоей) всесовершенное прощение и оставление прегрешений и воскреси в последний день не на суд или осуждение, но в прославление Твоея безконечныя милости во Царствии Твоем.

   Господи! Не затвори ему (ей) тогда двери Царствия Твоего, но сподоби услышати превожделенный глас Твой: «приидите благословеннии Отца Моего, и наследуйте уготованное вам Царствие от сложения мира», яко Ты еси живот и воскресение наше и Тебе славу возсылаем, со безначальным Твоим Отцем и Пресвятым и Благим и Животворящим Твоим Духом, ныне и присно и во веки веков. Аминь.