Молитвы о детях, умерших некрещеными (тексты)

Молитва о детях, умерших некрещеными:

Помяни, Человеколюбче Господи, чадо мое (имя) умершее некрещеным. Окрести его Ты Сам, Господи, в море щедрот Твоих и не лиши света Твоего Божественного. За веру и слезы родителей его и ради милосердия Твоего спаси его неизреченною Твоею благодатью. Аминь.

Молитва верующей матери к Милосердному Господу о сознательно загубленных душах во утробе своей:

Помяни, Человеколюбче Господи, души отшедших рабов Твоих младенцев, кои в утробе православных матерей умерли нечаянно от случайных действий или от трудного рождения, или от некоей неосторожности, или сознательно загубленных и потому не принявших Святого Крещения. Окрести их, Господи, в море щедрот Твоих и спаси неизреченною Твоею
благодатию, а меня, грешную (имя), совершившую убийство младенца в утробе моей, прости и не лиши Твоего милосердия. Аминь.
Боже, Милостив буди мне , грешной.
(земной поклон) 
Господи, помилуй чад моих, умерших в утробе 
моей, за веру и слезы мои, ради милосердия Твоего, 
Господи, не лиши их Света Твоего Божественного.
(молиться всю жизнь)

Молитва 1:

Господи, помилуй мя за убитых во чреве детей моих.

Молитва 2:

О, Владыко, Господи Иисусе Христе, Сыне Божий! Премногия благости Твоея, нас ради человек и нашего ради спасения в плоть оболкийся, и распныйся, и погребыйся, и Твоею Кровию обновивый растлевшее естество наше, приими мое покаяние во грехах и услыши глаголы моя: согрешила, Господи, на Небо и пред Тобою, словом, делом, душею и телом, и мыслию ума моего. Заповеди Твоя преступила, не послушала повеления Твоего, прогневала благость Твою, Боже мой, но яко творение Твое есть, не отчаяваюся во спасении, но к безмерному Твоему Благоутробию дерзая прихожду и молюся Тебе: Господи! в покаянии даждь ми сокрушенное сердце и приими мя, молящуюся и даждь ми мысль благую, даждь ми слезы умиления, Господи, даждь ми по благодати Твоей положити начало благое. Помилуй мя, Боже, помилуй мя падшую, и помяни мя, грешную рабу Твою во Царствии Твоем, ныне и присно и во веки веков. Аминь.

Молитва 3:

О, Боже, Премилосерднейший Христе Иисусе, Искупителю грешных, ради спасения рода человеческаго Ты оставил еси, Всемилостиве, преславная Небеса и вселился еси во юдоль плачевную и многогрешную, Ты приял еси на Божественная рамена Твоя наша немощи, и понесл еси наша болезни; Ты, о Страдальче Святый, уязвлен был за грехи наша и мучим за беззакония наша, а посему и мы к Тебе, Человеколюбче, возносим наши смиренныя мольбы: приими их, о Преблагий Господи, и снизойди к немощам нашим и грехов наших не помяни, и праведный гнев Твой за беззакония наша на ны движимый отврати от нас. Кровию Твоею Всечестною обновивый падшее естество наше, обнови, Господи Иисусе Христе, Спасителю наш, и нас, во тли грехов сущих, и утеши сердца наша радостию всепрощения Твоего. С воплем и безмерными слезами раскаяния припадаем к стопам Твоего Божественного милосердия, и молим Тя: благодатию Твоею очисти нас от всех неправд и беззаконий жития нашего. Да во святыни Твоего Человеколюбия восхвалим Всесвятое Имя Твое, со Отцем и Преблагим и Животворящим Духом, ныне и присно и во веки веков. Аминь.

Молитва Пресвятой Богородице:

Милосердия двери отверзи нам, Благословенная Богородице, надеющиися на Тя, да не погибнем, но да избавимся Тобою от бед, Ты бо еси спасение рода христианскаго. Радуйся, Едина Пречистая Мати Единаго Создателя, Господа, Бога и Спаса нашего, Иисуса Христа! Буди ми Ходатаица в день страшнаго испытания, егда предстану Престолу Нелицемернаго Судии, яко да огненнаго прещения муки избавлюся молитвами Твоими, Едина Благословенная. Пресвятая Богородице, спаси нас!

Домашняя молитва о умерших во чреве:

Господи, помилуй чад моих, умерших в утробе моей, за веру и слезы мои, ради милосердия Твоего, Господи, не лиши их Света Твоего Божественного.

Молитвы святому мученику Уару:

Святому молятся о умерших некрещёными, о убиенных во чреве младенцах.

Молитва:

О святый мученице  Уаре  досточудный, ревностью по Владыце Христу разжигаем, Небеснаго Царя пред мучителем исповедал еси, и о Нем усердно пострадал еси и ныне Церковь почитает тя, яко прославляемаго от Владыки Христа славою Небесною, иже дарова тебе благодать великаго к Нему дерзновения, и ныне предстоиши Ему со Ангелы, и в Вышних ликуеши, и зриши ясно Святую Троицу, и светом безначальнаго Сияния наслаждаешися, воспомяни и наших сродников томление, умерших в нечестии, приими наше прошение, и якоже Клеопатрин род неверный молитвами Твоими от вечных мук свободил еси, тако воспомяни елицы противобожне погребенныя, умершия некрещеными, потщися испросити Оным от вечныя тьмы избавление, да вси едиными усты и единем сердцем восхвалим Премилосерднаго Творца во веки веков. Аминь.

Св.младенцам, Христа ради избиенным в Вифлееме:

Младенцам молятся о убиенных во чреве младенцах.

Тропарь младенцам, глас 1-й:

Болезньми святых, имиже о Тебе пострадаша, умолен буди, Господи, и вся наша болезни исцели, Человеколюбче, молимся.
 
Кондак младенцев, глас 6-й:

В Вифлееме рождшуся Царю, волсви от Персиды с дары приходят, звездою свыше наставляеми, но Ирод смущается и пожинает младенцы, яко пшеницу, и рыдает себе, яко держава его вскоре разорится.

Молитвы преподобному Ипатию Печерскому, целебнику:

Молитва первая:

О священная главо, преподобне отче, преблаженне авво Ипатие, не забуди убогих твоих до конца, но поминай нас всегда во святых и благоприятных молитвах к Богу: помяни стадо твое, еже сам упасл еси, и не забуди посещати чад твоих моли за ны, отче священный, за дети твоя духовныя, яко имеяй дерзновение к Небесному Царю: не премолчи за ны ко Господу, и не презри нас, верою и любовию чтущих тя: поминай нас недостойных у Престола Вседержителева, и не престай моляся о нас ко Христу Богу, ибо дана тебе бысть благодать за ны молитися. Не мним бо тя суща мертва: аще бо телом и преставился еси от нас, но и по смерти жив сый пребываеши, не отступай от нас духом, сохраняя нас от стрел вражиих и всякия прелести бесовския и козней диавольских, пастырю наш добрый аще бо и мощей твоих рака пред очима нашима видима есть всегда, но святая твоя душа со ангельскими воинствы, со безплотными лики, с небесными силами, у престола Вседержителева предстоящи, достойно веселится, ведуще убо тя воистину и по смерти жива суща, тебе припадаем и тебе молимся: молися о нас Всесильному Богу, о пользе душ наших, и испроси нам время на покаяние, да невозбранно прейдем от земли на небо, от мытарств же горьких, бесов воздушных князей и от вечныя муки да избавимся, и Небеснаго Царствия наследницы да будем со всеми праведными, от века угодившими Господу нашему Иисусу Христу: Ему же подобает всякая слава, честь и поклонение, со Безначальным Его Отцем, и с Пресвятым и Благим и Животворящим Его Духом, ныне и присно, и во веки веков. Аминь.

Молитва вторая:

Преподобне отче Ипатие! Воззри на нас милостивно и к земли приверженных возведи к высоте небесней. Ты горе на небеси, мы на земли низу, удалены от тебе, не толико местом, елико грехми своими и беззаконии, но к тебе прибегаем и взываем: настави нас ходити путем твоим, вразуми и руководствуй. Вся твоя святая жизнь бысть зерцалом всякия добродетели. Не престани, угодниче Божий, о нас вопия ко Господу. Испроси предстательством своим у Всемилостиваго Бога нашего мир Церкви Его, под знамением креста воинствующей, согласие в вере и единомудрие, суемудрия же и расколов истребление, утверждение во благих делех, больным исцеление, печальным утешение, обиженным заступление, бедствующим помощь. Не посрами нас, к тебе с верою притекающих. Вси православнии христиане, твоими чудесы исполненнии и милостями облагодетельствованнии, исповедуют тя быти своего покровителя и заступника. Яви древния милости твоя, и ихже отцем всепомоществовал еси, не отрини и нас, чад их, стопами их к тебе шествующих. Предстояще всечестней иконе твоей, яко тебе живу сущу, припадаем и молимся: приими моления наша и вознеси их на жертвенник благоутробия Божия, да приимем тобою благодать и благовременную в нуждех наших помощь. Укрепи наше малодушие и утверди нас в вере, да несомненно уповаем получити вся благая от благосердия Владыки молитвами твоими. О, превеликий угодниче Божий! Всем нам, с верою притекающим к тебе, помози предстательством твоим ко Господу, и всех нас управи в мире и покаянии скончати живот наш и преселитися со упованием в блаженныя недра Авраамова, идеже ты радостно во трудех и подвизех ныне почиваеши, прославляя со всеми святыми Бога, в Троице славимаго, Отца и Сына и Святаго Духа, ныне и присно и во веки веков. Аминь.

Тропарь преподобному, глас 1:

Безначальнаго онаго и тихаго места, идеже несть печали, ни воздыхания, достигнути, преподобне, желая, не дал еси себе зде покоя нимало, но присно день и нощь в делах всяких и жестоком житии трудолюбно подвизающися, пребываеши, тем желаемаго получил уже, Ипатие, молися о душах наших.

Тропарь преподобному, глас 8:

В тебе, отче, известно спасеся еже по образу приим бо крест последовал еси Христу, и дея учил еси презирати убо плоть, приходит бо: прилежати же о души, вещи безсмертней: тем же и со Ангелы срадуется, преподобне Ипатие, дух твой.

Кондак преподобному, глас 2:

Чистотою душевною Божественно вооружився, и непристанныя молитвы яко копие вручив крепко, пробол еси бесовская ополчения Ипатие, моли непрестанно о всех нас.

Кондак преподобному, глас 3:

Труды ко трудом выну ради Господа прилагая, никогдаже обрелся еси празднен, Ипатие. Темже и в лепоту трудолюбив наречеся, звание прием от дел.

Величание преподобному:

Ублажаем тя, преподобне отче Ипатие, и чтем святую память твою, наставниче монахов и собеседниче Ангелов.