Молитвы при болезнях глаз (тексты)

Молитвы Пресвятой Богородице перед ее иконой "Казанская":
 
О, Пресвятая Госпоже, Владычице Богородице! Со страхом, верою и любовию припадающе пред честною и чудотворною иконою Твоею, молим Тя: не отврати лица Твоего от прибегающих к Тебе, умоли, милосердная Мати, Сына Твоего и Бога нашего, Господа Иисуса Христа, да сохранит мирну страну нашу, Церковь же Свою святую непоколебиму да соблюдет, и от неверия, ересей и раскола да избавит. Не имамы бо иныя помощи, не имамы иныя надежды, разве Тебе, Пречиста Дево, Ты еси всесильная христиан Помощница и Заступница: избави же и всех, с верою Тебе молящихся, от падений греховных, от навета злых человек, от всяких искушений, скорбей, болезней, бед и от внезапныя смерти: даруй нам дух сокрушения, смирение сердца, чистоту помышлений, исправление греховныя жизни и оставление прегрешении, да вси, благодарне воспевающе величия и милости Твоя, являемый над нами зде на земли сподобимся и Небеснаго Царствия, и тамо со всеми святыми прославим пречестное и великолепное имя Отца и Сына и Святаго Духа во веки веков. Аминь.

Тропарь, глас 4-й:

Заступнице усердная, Мати Господа Вышняго, за всех молиши Сына Твоего Христа Бога нашего, и всем твориши спастися, в державный Твой покров прибегающим. Всех нас заступи, о, Госпоже, Царице и Владычице, иже в напастех и в скорбех и в болезнех, обремененных грехи многими, предстоящих и молящихся Тебе умиленною душею и сокрушенным сердцем пред пречистым Твоим образом со слезами, и невозвратно надежду имущих на Тя избавления всех зол, всем полезная даруй и вся спаси, Богородице Дево: Ты бо еси Божественный покров рабом Твоим.

Кондак, глас 8-й:

Притецем, людие, к тихому сему и доброму пристанищу, скорой Помощнице, готовому и теплому спасению, покрову Девы; ускорим на молитву и потщимся на покаяние: источает бо нам неоскудныя милости Пречистая Богородица, предваряет на помощь и избавляет от великих бед и зол благонравныя и богобоящияся рабы Своя.

Величание:

Величаем Тя, Пресвятая Дево, Богоизбранная Отроковице, и чтим образ Твой святый, имже точиши исцеления всем с верою притекающим.

Святому мученику и архидиакону Лаврентию Римскому:

Тропарь, глас 4-й:

Мученик Твой, Господи, Лаврентий, во страдании своем венец прият нетленный от Тебе, Бога нашего: имеяй бо крепость Твою, мучителей низложи, сокруши и демонов немощныя дерзости, Того молитвами спаси души наша.

Кондак, глас 4-й:

Огнем Божественным распалив сердце твое, огнь страстей до конца испепелил еси, страдальцев утверждение, богоносне мучениче Лаврентие, и в страданиих вопиял еси верно: ничтоже мя разлучит любве Христовы.
 
Молитва:

О, пресвятый и предивный стратотерпче Христов, архидиаконе Лаврентие! Восхваляюще веру и страдания твоя, почитаем победу и венценосное прохождение твое чрез горящее углие от тьмы века сего ко свету невечернему Престола Величествия Божия, темже убо молим тя: якоже древле притекавшия с верою к покрову твоему чудесы твоими утвердил еси, тако да приимеши и нас под покров твой, и в болезни и печалех наших заступник нам да будеши: и якоже от слепоты телесных очес Крискентиана преложением рук исцелил еси, тако да исцелиши предстательством твоим у Престола Божия и нашу душевную слепоту; призри на разслабление наше телесное и душевное, и укрепи нас бодренностию противу враг наших видимых и невидимых, удручающих нас напастьми. Да твоею, помощию путь маловременныя жизни сея прешедше, непобежден и от бед и скорбей и всякаго лютаго обстояния, достигнем неприступныя славы величествия Божия, идеже предстоя, молишися со дерзновением за люди прибегающия с верою к тебе и воспевающия дивнаго во святых Бога Израилева во веки веков. Аминь.

Молитва мученику Лонгину Сотнику:

Кондак, глас 4:

Весело возрадовася Церковь в памяти днесь приснопамятнаго страдальца Лонгина, взывающи: Ты моя держава, Христе, и утверждение.

Молитва:

О, святый мучениче Лонгине! Пилатом повелено тебе было с воинами стать на страже при кресте Господа Иисуса. Ты же, недуговав очима и исцелев от капли крови Господа, капнувшей тебе в очи, обрел и духовное прозрение и, видя чудеса, при распятии Господа происходившие, и трус, и солнечное затмение, и мертвых из гробов воскресение, исповедал явно Иисуса Христа Сыном Божиим. И с кустодиею у гроба Господня находясь, и Воскресение Христово в трепете зря, сребренники, даваемые синедрионом за скрытие воскресения, ты отверг и, Христа проповедав, во главу усечен быв. И по усечении главы вдове некоей, очима недуговавшей, во сне явившись, и ей, обретшей честную главу твою, прозрение даровал еси. Молим тя, святый мучениче Христов Лонгине, болящим очима яви скорую помощь твою и исцели их, дабы, освободившись от недуга своего, не захотели они видеть ничего, распаляющаго сластолюбие, но к созерцанию духовной красоты устремились, славя Бога. Аминь.

При заболевании глаз, при угрозе потери зрения следует обращаться к угоднику Божию Симеону Верхотурскому, чудотворцу. Открытие мощей Симеона сопровождалось исцелением глазной болезни, иногда долгой и тяжелой. Этот угодник Божий часто сам является больным во сне и призывает их искать у него помощи.

Молитва праведному Симеону Верхотурскому:

О, святый и праведный Симеоне, чистою душею твоею в небесных обителех в лице святых водворяяйся, на земли же телом твоим нетленно почиваяй по данней ти благодати от Господа молитися о нас. Милостиво призри на нас мгногогрешных, аще и недостойне, обаче с верою и упованием ко святым и цельбоносным мощем твоим притекающих, и испроси нам от Бога прощение согрешений наших, в няже впадаем множицею во вся дни жития нашего. И якоже прежде овым убо от очныя зельныя болезни ни мало зрети могущим исцеление очес, овым же близ смерти бывшим от лютых недугов врачевание, и иным иная многая преславная благодеяния даровал еси: сице избави и нас от недугов душевных и телесных и от всякия скорби и печали, и вся благая к настоящему житию нашему и к вечному спасению благопотребная нам от Господа испроси, да тако твоим предстательством и молитвами стяжавше вся нам полезная, аще и недостойнии, благодарне восхваляюше тя, прославим Бога, дивнаго во святых Своих, Отца и Сына и Святаго Духа, ныне и присно и во веки веков. Аминь.

Для улучшения зрения читают молитву князю Владимиру, который сам страдал от слепоты и прозрел после принятия Святого Крещения:

О великий угодниче Божий, богоизбранный и богопрославленный, равноапостольный княже Владимире!

Ты отринул еси зловерие и нечестие языческое, уверовал еси во Единаго Истиннаго Триипостаснаго Бога и, восприяв Святое Крещение, просветил еси светом Божественныя веры и благочестия всю страну русскую. Славяще убо и благодаряще Премилосерднаго Творца и Спасителя нашего, славим, благодарим и тя, просветителю наш и отче, яко тобою познахом спасительную веру Христову и крестихомся во имя Пресвятыя и Пребожественныя Троицы: тою верою избавихомся от праведного осуждения Божия, вечнаго рабства диаволя и адова мучительства; тою верою восприяхом благодать всыновления Богу и надежду наследования небеснаго блаженства. Ты еси первый вождь наш к Начальнику и Совершителю нашего вечного спасения Господу Иисусу Христу; ты еси теплый молитвенник и ходатай о стране Российской, о воинстве и о всех людех.

Не может язык наш изобразити величие и высоту благодеяний, тобою излиянных на землю нашу, отцов и праотцев наших и на нас, недостойных.

О всеблагий отче и просветителю наш!

Призри на немощи наша и умоли Премилосердаго Царя Небеснаго, да не прогневается на ны зело, яко по немощем нашим и по вся дни согрешаем, да не погубит нас со безакониями нашими; но да помилует и спасет нас по милости Своей, да всадет в сердце наше спасительный страх Свой, да просветит Своею благодатию ум наш. Во еже разумети нам пути Господни, оставити стези нечестия и заблуждений, тщатися же во стезях спасения и истины, неуклоннаго исполнения Заповедей Божиих и уставов Святыя Церкве. Моли, благосердце, Человеколюбца Господа, да пробавит великую милость Свою, да избавит нас от нашествия иноплеменных, от внутренних беспорядков, мятежей и раздоров, от глада, смертоносных болезней и от всякого зла, да подаст нам благорастворение воздуха и плодоносие земли, да даст пастырем ревность о спасении пасомых, всем же людем споспешение о еже усердно службы своя исправляти, любовь между собою и единомыслие имети, на благо же Отечества и Святые Церкве верне подвизатися, да возсияет свет спасительныя веры в стране нашей во всех концех ея, да упразднятся все ереси и расколы, да, тако поживше в мире на земли, сподобимся с тобою вечнаго блаженства, хваляще и превозносяще Бога во веки веков. Аминь.

О прозрении ослепших очес — Пресвятой Богородице Казанской:

Молитва пред иконою Пресвятыя Богородицы Казанскою

О Пресвятая Госпоже, Владычице Богородице! Со страхом, верою и любовию пред честною (и чудотворною) иконою Твоею припадающе, молим Тя: не отврати лица Твоего от прибегающих к Тебе: умоли, милосердая Мати, Сына Твоего и Бога нашего, Господа Иисуса Христа, да сохранит мирну страну нашу, церковь же Свою святую непоколебиму да соблюдет, и от неверия, ересей и раскола да избавит: не имамы бо иныя помощи, не имамы иныя надежды, разве Тебе, Пречистая Дево: Ты еси всесильная христиан помощница и заступница: избави же и всех, с верою Тебе молящихся, от падений греховных, от навета злых человек, от всяких искушений, скорбей, болезней, бед и от внезапныя смерти: даруй нам дух сокрушения, смирение сердца, чистоту помышлений, исправление греховныя жизни и оставление прегрешений, да вси благодарне воспевающе величия и милости Твоя, являемыя над нами зде на земли, сподобимся и Небеснаго Царствия, и тамо со всеми святыми прославим пречестное и великолепое имя Отца и Сына и Святаго Духа во веки веков.