Молитвы при болезнях горла (тексты)

Акафист Священномученику Власию Севастийскому:

Святой Власий сам молил Бога, чтобы Он даровал ему благодать исцелять болезни горла и в опасности удавления костью. Ему молятся и при врачевании животных.

Тропарь, глас 4:

И нравом причастник, и престолом наместник Апостолом быв, деяние обрел еси, богодухновенне, в видения восход, сего ради слово истины исправляя, и веры ради пострадал еси даже до крове, священномучениче Власие, моли Христа Бога спастися душам нашим.

Кондак, глас 2:

Божественное прозябение, цвет неувядаемый, лозы Христовы розго многострадальная, Богоносе Власие, верою чтущия память твою веселия твоего исполни, моляся непрестанно о всех нас.

Кондак 1:

Избранный угодниче Христов, скорый предстателю и теплый о нас к Богу молитвенниче, священномучениче Власие, призывающих тя во всяких молениях услышати обещавый, яко имеяй дерзновение ко Господу, не престай моляся о чтущих святую память твою, хвалебная пения о тебе Богу приносящих и с любовию тебе зовущих: Радуйся, молитвенниче наш, скорый помощниче, священномучениче Власие.

Икос 1

Ангела хранителя пастве твоей даде тя Господь и Бог наш: зряще во благочестии процветшее кроткое и безпорочное твое житие, людие севастийстии потщашася, да будеши во епископа им поставлен. И воистину стадо Христово добре упасл еси. Мы же, видяще о тебе таковое Божие благоволение, взываем сице:
Радуйся, истинный и добрый пастырю стада Христова.
Радуйся, за любовь Христову душу свою положивый.
Радуйся, любви Христовой образ нам в себе явивый.
Радуйся, како пасти стадо Христово служением своим пастырям показавый.
Радуйся, овцы словесныя како жити, житием научивый.
Радуйся, молитвенниче наш, скорый помощниче, священномучениче Власие.

Кондак 2:

Видя на христиан гонение лютое от безбожнаго мучителя Диоклетиана, яко мнози благочестивии людие, страха ради мук и темниц, от града бежавше, в лесах и горах, в вертепах и пропастех земных скрывахуся. Ты же, блаженне Власие, не имея воли Господни на подвиг мученический прежде времени себе вдаяти, таковым людем споследовал еси и в горе пустынней вселися, житие твое тамо в постничестве и безмолвии с молитвою непрестанною провождал еси, поя Богу: Аллилуиа.

Икос 2:

Разумев, яко человек образ Божий есть и к Первообразу должен себе управити, богомудре Власие, ум и сердце к небесным вперив, в богомыслии и благочестии преуспеваше, и тако сокровищем нетленным обогатися. Темже ангела суща на земли тя почитающе, звании ублажаем сими: Радуйся, не земли, яко на небеси поживый. Радуйся, ангеле земный, хранителю пастве твоей бывый. Радуйся, словесных овец твоих учением Божественных словес питавый. Радуйся, дарования небесная от Господа приемый. Радуйся, врачу телесный, во врача душ от Господа возращенный. Радуйся, и по кончине твоей всякая исцеления обильно всем источаяй. Радуйся, молитвенниче наш, скорый помощниче, священномучениче Власие.

Кондак 3:

Силою Божиею влекомый, к Евстратию мученику, в темнице томимому, нощию пришел еси, святителю Христов Власие, и пад ниц, в дивнем подвизе исповедания Христова его укреплял еси. Видя же его терпение твердое и мужество, прославил дивнаго во святых Своих Бога, поя Ему: Аллилуиа.

Икос 3:

Имамы тя сосуд благодати, исполненный многих дарований Христовых, яко и звери лютии исцеление от тебе получают, мы же неоскудных милостей и чудес тобою от Господа сподобляеми, священномучениче Власие, исплетше венец похвалы, благодарно вопием ти:
Радуйся, благодатный дарований небесных носителю.
Радуйся, скотов земных кормителю и целителю.
Радуйся, пастырю добрый, даров Христовых раздаятелю.
Радуйся, паствы твоей истинный наставниче и питателю.
Радуйся, яко звери лютии молитве твоей внимают.
Радуйся, яко притекающии к тебе людие в бедах избавление обретают.
Радуйся, молитвенниче наш, скорый помощниче, священномучениче Власие.

Кондак 4:

Буря житейских гонений от злочестиваго мучителя, юже воздвиже на тя, мучениче Христов Власие, во еже поколебати святую веру твою, ничимже возмогла есть смутити тя, егда посланнии приидоша к тебе, в пещере обитающу, безумное веление того исполнити. Ты же нерадив о муках и временней почести, волю же Господню узрев, страдальческим мужеством вооружился еси, в радости поя Богу: Аллилуиа.

Икос 4:

Слышавше, яко знамения многая и чудеса деются о имени прославляемаго от тебе Христа Бога нашего, и яко мнози от еллин вероваша в Него, егда шествовал еси, богоносе Власие, на страдания твоя, жена некая приступльше паде ниц к ногама твоима, со слезами моляше тя помощи сыну ея, ибо кость ста в гортани его и бысть яко мертв. Ты же, добрый пастырю, с верою воззвал еси Спасителю всех, да исцелеет отрок ея, и тако моляся, просил еси Господа: аще от человек или скотов кая-либо беда имать кому быти, и той помянет имя твое, помощи всякому, да прославится Имя Его Пресвятое. И виде жена, яко исцеле отрок ея, прослави Бога, хвалу тебе воздая. С неюже и мы усердно вопием ти:
Радуйся, крепкою верою твоею и чудесы ко Христу неверныя обративый.
Радуйся, на страдания за Христа доблестно шествовавый.
Радуйся, в призывании святаго имени Христова твердую любовь и несомненную надежду в себе показавый.
Радуйся, силою молитвы твоея отроку исцеление от Господа даровавый.
Радуйся, не точию человеком, но и скотом врачевание подававый.
Радуйся, и нас во всяких бедах и нуждах дерзновенно призывати тебе подвигнувый.
Радуйся, молитвенниче наш, скорый помощниче, священномучениче Власие.

Кондак 5:

Боготечную звезду, во мраце неверия яко в нощи сияющую и просвещающую души всех, хотящих спастися, видев тя, Агриколай игемон, не восхоте разумети, на страдания за Христа предаде тя и палицами много и немилосердно бити повеле. Ты же, священномучениче Власие, ярость мучителя усрамляя, воспевал еси Богу: Аллилуиа.

Икос 5:

Видя мучитель непреложную веру твою, за нюже муки всякия терпети готов был еси, страстотерпче Христов Власие, паче же смутися словесы твоими, зане рекл еси: «Твори, еже хощеши, да никако отвратиши мене от исповедания Божия», - в темницу повеле всадити тя. Мы же, дивящеся таковому твердому твоея веры Христовы исповеданию, от всея души воспеваем ти таковая:
Радуйся, исповедниче Божий избранный.
Радуйся мучениче Христов прославленный.
Радуйся, нечестие игемона на судищи посрамивый.
Радуйся, уловлению его льстивому внимати себе отвративый.
Радуйся, ризу твою священную кровми страданий твоих украсивый.
Радуйся, исповедания Христова образ нам в себе явивый.
Радуйся, молитвенниче наш, скорый помощниче, священномучениче Власие.

Кондак 6:

Проповедует тя, блаженне Власие, Церковь Христова, яко истинна добра пастыря, по отшествии твоем в жизнь вечную не оставляющаго верныя, но якоже обещался еси, во всяких прошениях присно нас предваряюща и соблюдающа во всяких скорбех, бедах и нуждах всех, благодарно зовущих о тебе Богу: Аллилуиа.

Икос 6:

Возсиял еси, блаженне Власие, яко финикс процветший в меру возраста совершения Христова, от Негоже прием небесныя дарования, купно с лики святых во славе на небеси ныне пребываеши и нас молитвами твоими во дворы Господни вселитися готовиши, прилежно вопиющих ти таковая:
Радуйся, яко пред престолом Царя Небеснаго в веселии вечнем ныне пребываеши.
Радуйся, яко с лики Ангел и святых Творцу всех славу воспеваеши.
Радуйся, пред Всевышним ходатаю наш усердный.
Радуйся, наших к Нему молитв возносителю прилежный.
Радуйся, от бед защитниче наш небесный. Радуйся, попечителю наш верный.
Радуйся, молитвенниче наш, скорый помощниче, священномучениче Власие.

Кондак 7:

Хотяще почтити тя, страстотерпче Христов Власие, вдовица некая нища яство уготова, в темницу тебе принесе, и падши к ногама твоима, моляше, да бы ял еси. Ты же, отче святый, благословив вдовицу, заповедал еси ей, глаголя: «Жено, твори такожде память мою, и ничтоже оскудеет в дому твоем, и аще ин кто подобен ти будет и память мою сотворит, даров Божиих исполнится и благословен будет во вся дни живота своего». И виде жена последи, яко благослови ю Бог довольством многим, поведаша всюду яже глаголал еси к ней, поющи Богу: Аллилуиа.

Икос 7:

Новыя муки, горшия первых, ищуще вселукавый мучитель, егда из темницы паки на судище возва тя, славне мучениче, хотя бо испытати, принесеши ли жертву богом, или хощеши зле погибнути. Нечестия сия ты отринул еси и силою Божественною укрепился еси: темже ни биения, ни раны, ниже на древе повешание и строгание телесе твоего, имиже мучим был еси, никакоже возмогоша победити славное твое терпение. Ты же рекл еси мучителю: «Бози, иже небеси и земли не сотвориша, да погибнут. Не боюся твоих временных мук, ибо взираю на будущия благая, любящим Бога уготованная». Сего ради тебе, доблестному воину Христову, воспеваем таковая:
Радуйся, многими ранами и страшными муками за Христа страдавый.
Радуйся, повешение на древе и орудии железными строгание Егоже ради терпевый.
Радуйся, богоборства неверных обличителю.
Радуйся, веры Христовой защитниче и хранителю.
Радуйся, немощную нищету идолов суетных показавый.
Радуйся, веру в жизнь вечную и блага будущия исповедавый.
Радуйся, молитвенниче наш, скорый помощниче, священномучениче Власие.

Кондак 8:

Странен и недомыслим образ страдания твоего мучителю показася, нечестиваго бо того веления тебе небрегшу, подверже тя, священномучениче Власие, мучениям тяжким. Жены же благочестивыя, страдания твоя видевше, не убояшася, но кровь твою страдальческую с земли собирающе, исповедницы Христовы себе являху, Богу же воспеваху: Аллилуиа.

Икос 8:

Всем сердцем и всею душею Христа возлюбил еси, к Немуже богомудрыя жены, яко пастырь добрый, твоим подвигом страдальческим привлекл еси. Темже, блаженне Власие, похваляюще страдания твоя, с любовию зовем тебе:
Радуйся, страдальче Христов предивный.
Радуйся, честным страданием твоим мучителя удививый.
Радуйся, сострадавшия тебе жены на исповедание Христа подвигнувый.
Радуйся, светильницы света Христова тех соделавый.
Радуйся, будущих ради благ, страдания твоя ни во чтоже вменивый.
Радуйся, твердым веры исповеданием истинно веровати нас научивый.
Радуйся, молитвенниче наш, скорый помощниче, священномучениче Власие.

Кондак 9:

Всякия лести безбожныя отвергше, тебе же, блаженне Власие, последоваша жены богомудрыя, идольскую прелесть посрамити тщащеся, боги дати им игемона просиша, яко бы жертвы жрети тем хотяху, и ко езеру устремишася. Воины же, стрегущии их, мняху, яко прежде омовение по обычаю хотят совершити; они же кумиры тыя во глубину езера ввергоша и тако боги их поругаша, Богу же Истинному воспеша: Аллилуиа.

Икос 9

Витийство многовещанных пений, имиже достойно воспети тя дерзаем, не довлеет ти, прехвальне Власие: никая бо земная похвала славе небесней равна быти может. Ты же, предстояй ныне во славе Христовой, призри на нас, тебе молящихся и с любовию зовущих:
Радуйся, всем сердцем и душею Христа возлюбивый и себе всецело Ему предавый.
Радуйся, земная вся презревый и небесная селения унаследовавый.
Радуйся, во славу Божию на земли поживый и небесною славою увенчанный.
Радуйся, венец мученический от Христа приемый и к сонму святых мучеников сопричтенный.
Радуйся, на небесех от Ангел и святых проставляемый.
Радуйся, на земли от чтущих святую память твою хвалимый и воспеваемый.
Радуйся, молитвенниче наш, скорый помощниче, священномучениче Власие.

Кондак 10:

Спасти хотя души своя последствующия тебе жены, богоблаженне Власие, егда на место мучения приведени быша, молитву о них прияти о тебе Бога молиша, зане на путь истины привел еси их, темже убо на усечение мечем честныя главы своя предаша и к мучеником Христовым тако приобщишася, на небесех с лики святых поюще: Аллилуиа.

Икос 10:

Стена мучеником, слава христианом, столп и утверждение веры и благочестия был еси, священномучениче Власие. Буди и нам грешным, к тебе прибегающим, управитель изряден, веры хранитель, в скорбех и болезнех утешитель и целитель, в бедах и в напастех избавитель и покровитель и во всяких нуждах усердный предстатель, сицевое пение тебе приносящим и с любовию зовущим:
Радуйся, яко тобою вера Христова прославляется.
Радуйся, яко тебе ради неверие посрамляется.
Радуйся, яко тебе ради благочестие укрепляется.
Радуйся, яко тобою богохульницы смиряются.
Радуйся, яко мы, грешнии, упование на тебе возлагаем.
Радуйся, яко мы, недостойнии, спасение тобою от Бога получаем.
Радуйся, молитвенниче наш, скорый помощниче, священномучениче Власие.

Кондак 11:

Песнь хвалебную приносим ти, священномучениче Власие, о мужестве твоем и вере крепкой, юже явил еси, Христа исповедуя, егда виде мучитель твой, яко ни во чтоже вменяеши ни лести его лукавыя, ни мучения тяжкия, имиже от Христа отвратити тя желаше, вопроси тебе: «Аще во езеро ввергну тя, помилует ли тя Христос твой?» Емуже, достохвальне отче, не обинуяся рекл еси: «Аз чту Бога Истиннаго Живаго и во веки спасен буду, и на водах узриши силу Бога моего». И егда во езеро ввержен был еси, назнаменовав воду крестом, яко по суху шел еси. Посем же кончину мученическую за Христа, во главу усечен мечем быв, приял еси, хвалу Богу воспевая: Аллилуиа.

Икос 11:

Светодатель Христос Господь, видя душу твою, чистотою блистающуюся, не даде тебе быти под спудом, священномучениче Власие, но постави тя на свещнице архиерейства. Сего ради, не токмо в житии, но и по смерти светел светильник Христов показался еси, яко великий пастырь добре упасл еси паству твою, юже попеченьми своими и при кончине не оставил еси, не о себе точию, но о всем мире, наипаче же о тех, иже восхотят память твою сотворити, молитву усердную Богу принесл еси и блаженный глас Владыки Христа: «Вся прошения твоя исполню», - услышати сподобился еси. Темже молися о нас ко Господу, да просветит нас светом Своего Богоразумия и избавит от церковных нестроений, ересей и расколов и благочестие утвердит в нас, поющих тебе таковая:
Радуйся, светильниче света Христова.
Радуйся, украсителю церковный.
Радуйся, архиерею, Богом избранный.
Радуйся, хранителю веры Православныя.
Радуйся, вражды церковныя упразднителю.
Радуйся, спасения нашего управителю.
Радуйся, молитвенниче наш, скорый помощниче, священномучениче Власие.

Кондак 12:

Благодать Божия, яже в тебе, священномучениче Власие, прежде усечения главы твоея, честное лице твое светом Христовым озари, послежде от гроба твоего многоразличныя исцеления источи, к похвалению тебе всех понуждая, Богу же научая пети: Аллилуиа.

Икос 12:

Поем твоя дивныя подвиги и страдания, священномучениче Власие, имиже память твою светло украсил еси. Темже, благодаряще Бога, дивнаго во святых Своих, хвалебныя пения воспеваем тебе таковая:
Радуйся, Церкви Христовы богоизбранный светильниче.
Радуйся, веры Православныя преславный поборниче.
Радуйся, светило великое, нечестия мрак разгоняющее.
Радуйся, столпе церковный, благочестие утверждающий.
Радуйся, пастырей Церкви преславное украшение.
Радуйся, благочестием твоим верныя возвеселяяй.
Радуйся, молитвенниче наш, скорый помощниче, священномучениче Власие.

Кондак 13:

О многострадальный и всехвальный отче, священномучениче Власие, нынешнее наше приими приношение и избави нас от всяких болезней душевных и телесных, защити нас от враг видимых и невидимых и от всякаго мучения сохрани нас теплым твоим ходатайством пред престолом Всевышняго, да с тобою воспеваем Богу: Аллилуиа.

(Этот  кондак читается трижды, затем икос 1 и кондак 1)
 
Молитва:

О многострадальный отче, великий угодниче Божий, священномучениче Власие. Услыши нас,грешных,к тебе прибегающих и тепле тебе молящихся. Буря многих зол, бед и скорбей обдержит нас, болезни душевныя и телесныя и всякиянаваждения вражия обуревают нас. Мы же нерадим о спасении нашем, ниже достойны есмы по грехом нашим у Господа помощи просити. Но ты, добрый пастырю, велие дерзновение имеяй у Милостиваго Бога, якоже иногда ведомый на мучения твоя, вдовицы слезящия, приникшия к тебе, не отринул еси, ину бо от напасти зверя свободил еси, иныя же отроку исцеление у Господа испросил еси, такожде и ныне призри на чада твоя,в час сей к тебе притекшия, утешения и помощи просящия. Ты убо Господа умолил еси:аще кая болезнь или беда имут кому быти и той помянет имя твое – помощи всякому в прославление Его Пресвятаго Имени. Не отрини нас, молящихся тебе, но якоже обещался еси, во благо сотвори всякое прошение наше, по милости Всеблагаго Бога, Емуже честь и слава во веки веков. Аминь.

Молитва вторая:

Преблаженне и приснопамятне священномучениче Власие, дивный страдальче и предстателю наш теплый, по отшествии твоем в жизнь вечную призывающим твое святое имя пособствовати, и во всяких прошениих услышанным быти обещавый! Се ныне к тебе угоднику Божию, яко ко истинному ходатаю спасения, притекаем и смиренно молимся: предстани нам в помощь, узами грехов связанных, подвигнися на всемощные твоя к Богу молитвы и помолися о нас грешных: тя бо недостойнии, призывати на заступление дерзаем, и желаем от всех грехов наших тобою свобождение получити. О святче Божий Власие! В сокрушении и смирении сердца нашего пред тобою припадаем и молимся: осияй нас, омраченных наветы вражиими, светом благодати свыше, да в нем ходяще, не преткнем о камень ног наших. Тя, яко сосуд в честь избранный и исполненный благодати Божия, молим: сподоби нас грешных от исполнения твоего желаемое прияти, и исцели наша душевныя и телесныя язвы, грехом же нашим прощение и душевному и телесному нашему здравию и спасению полезное у Господа испроси, да всегда прославляем Отца и Сына и Святаго Духа, и твое милостивое предстательство о душах и телесех наших, ныне и присно и во веки веков. Аминь.

Молитва третья:

О великий и славный страстотерпче, помощниче наш и теплый заступниче всем с верою притекающим к тебе, святый священномучениче Власие! Призри от горния славы милостивым оком твоим на предстоящия люди и умильно тебе молящияся, простри теплыя молитвы твоя ко Господу Богу нашему, испроси у Него прощения согрешений наших, но еже избавитися нам от всегубительной язвы, труса, потопа, огня, меча и вечныя казни, исходатайствуй пред Престолом Господа Вседержителя немощным телесем нашим оставления согрешений, всем же чтущим честную память твою, укрепления на дела благая, не презри нас недостойных, молящихся тебе пред честною иконою твоею и просящих твоея помощи и заступления, испроси нам вся яже ко спасению нашему полезная, да богоугодная Владыце нашему Иисусу Христу зде творяще, сподобимся молитвами твоими наследовати Царствие Небесное, идеже вкупе с тобою прославим Единаго в Троице славимаго Бога Отца, и Сына, и Святаго Духа, во веки веков. Аминь.

Тропарь, глас 4:

Обрел еси Богодохновение в видения восход: сего ради слово истины исправляя и веры ради пострадал еси даже до крове, священномучениче Власие, моли Христа Бога спастися нашим душам.

Акафист преподобному Серафиму Саровскому чудотворцу:

Тропарь, глас 4-й:

 От юности Христа возлюбил еси, преподобне, и Тому Единому поработати пламенно вожделел еси, в пустыннем житии твоем непрестанною молитвою и трудом подвизался еси, умиленным сердцем любовь Христову стяжав, Небесным Серафимом в песнословии споборниче, в любви притекающим к тебе Христу подражателю, темже избранник возлюблен Божия Матере явился еси, сего ради вопием ти: спасай нас молитвами твоими, радосте наша, теплый пред Богом заступниче, Серафиме блаженне.

АКАФИСТ:

Кондак 1:

Избранный чудотворче и предивный угодниче Христов, скорый помощниче и молитвенниче наш, преподобне отче Серафиме! Величающе прославльшаго тя Господа, воспеваем ти похвальная. Ты же, имеяй велие дерзновение ко Господу, от всяких нас бед свободи, зовущих: Радуйся, преподобне Серафиме, Саровский чудотворче.

Икос 1:

 Ангелов Творец избра тя изначала, да прославиши житием твоим пречудное имя Святыя Троицы: явился бо еси воистинну ангел на земли и во плоти серафим; яко луч пресветлый Вечнаго Солнца Правды, просветися житие твое. Мы же, зряще прехвальныя труды твоя, с благоговением и радостию глаголем ти сицевая:
Радуйся, правило веры и благочестия;
радуйся, образе кротости и смирения.
Радуйся, преславное верных величание;
радуйся, претихое скорбным утешение.
Радуйся, прелюбимое иноков похваление;
радуйся, живущим в мире предивное поможение.
Радуйся, Российския державы славо и ограждение;
радуйся, тамбовския страны священное украшение.
Радуйся, преподобне Серафиме, Саровский чудотворче

Кондак 2:

 Видящи мати твоя, преподобне отче Серафиме, теплую любовь твою ко иноческому житию, позна святую волю Господню о тебе, и Богу, яко дар совершен приносящи, благослови тя на тесный путь иноческий святым крестом своим, егоже до конца жития твоего на персех носил еси, знаменуя велию любовь твою к распеншемуся за ны Христу Богу нашему, Емуже вси со умилением зовем: Аллилуиа.

Икос 2:

Разум небесный тебе даровася, святче Божий: от юности твоея не престая помышляти о Небеснем, оставил еси дом отчий Царствия Божия ради и правды Его. Сего ради приими от нас похвалы сия:
Радуйся, града Курска чадо богоизбранное;
радуйся, родителей благочестивых отрасль пречестная.
Радуйся, добродетели матере своея унаследивый;
радуйся, благочестию и молитве ею наученный.
Радуйся, на подвиги от матере крестом благословенный;
радуйся, благословение сие яко святыню до смерти соблюдый.
Радуйся, любве ради Господа дом отеческий оставивый;
радуйся, вся красная мира сего ни во чтоже вменивый.
Радуйся, преподобне Серафиме, Саровский чудотворче.

Кондак 3:

 Сила Вышняго от юности твоея воистинну храняше тя, преподобне: с высоты бо храма спадша сохрани тя Господь неврежденна, и страждущу ти люте Сама Владычица мира явися, с Небес исцеление принесши, зане измлада верно служил еси Богу, выну взывая Ему: Аллилуиа.

Икос 3:

 Имея тщание о подвизе иноческаго равноангельнаго жития, во град святый Киев поклонения ради преподобным Печерским притекл еси, и от уст преподобнаго Досифеа повеление приим в пустыню Саровскую путь свой управити, верою издалеча облобызал еси место святое сие, и тамо вселився житие твое богоугодное скончал еси. Мы же, дивящеся таковому о тебе Божию промышлению, со умилением вопием ти:
Радуйся, мирския суеты отрешивыйся;
радуйся, Небеснаго Отечества пламенно возжелевый.
Радуйся, Христа всем сердцем возлюбивый;
радуйся, благое иго Христово на себе восприемый.
Радуйся, совершеннаго послушания исполненный;
радуйся, святых заповедей Господних блюстителю верный.
Радуйся, ум твой и сердце в Бозе молитвенно утвердивый;
радуйся, столпе благочестия непоколебимый.
Радуйся, преподобне Серафиме, Саровский чудотворче.

Кондак 4:

 Бурю злых напастей утишая, прошел еси весь путь тесный и скорбный подвига иноческаго, несый ярем пустыннаго жития, затвора и молчания, многонощнаго бдения, и тако, благодатию Божиею восходя от силы в силу, от деяния к боговидению, преселился еси во Обители Горния, идеже со Ангелы поеши Богу: Аллилуиа.

Икос 4:

Слышаще и видяще святое житие твое, преподобне отче Серафиме, вся братия твоя удивляхуся тебе и, приходяще к тебе, поучахуся о словесех твоих и подвизех, славяще Господа, дивнаго во святых Своих. И мы вси с верою и любовию восхваляем тя, преподобне отче, и вопием ти сице:
Радуйся, всего себе в жертву Господеви принесый;
радуйся, на высоту безстрастия возшедый.
Радуйся, воине Христов добропобедный;
радуйся, Небеснаго Домовладыки рабе благий и верный.
Радуйся, предстателю о нас пред Господем непостыдный;
радуйся, к Богородице молитвенниче наш неусыпный.
Радуйся, пречуднаго благоухания крине пустынный;
радуйся, благодати Божия сосуде непорочный.
Радуйся, преподобне Серафиме, Саровский чудотворче.

Кондак 5:

 Божественный свет осия жилище твое, преподобне, егда болящу ти и на одре смертнем лежащу, Сама Пречистая Дева, пришедши к тебе со святыми апостолы Петром и Иоанном, рече: “Сей есть от рода нашего”, - и главе твоей коснуся. Абие же исцелев, воспел еси благодарне Господеви: Аллилуиа.

Икос 5:

 Видя враг рода человеча чистое и святое житие твое, преподобне Серафиме, восхоте погубити тя: наведе бо на тя люди злы, иже беззаконно истязаху тя и еле жива суща оставиша; ты же, отче святый, яко агнец кроток, вся претерпел еси, за обидящих тя Господеви моляся. Темже мы вси, таковому твоему незлобию дивящеся, вопием ти:
Радуйся, в кротости и смирении твоем Христу Богу подражавый;
радуйся, незлобием твоим духа злобы победивый.
Радуйся, чистоты душевныя и телесныя хранителю усердный;
радуйся, пустынниче, дарами благодатными преисполненный.
Радуйся, подвижниче богопрославленный и прозорливый;
радуйся, наставниче монахов предивный и богомудрый.
Радуйся, Святыя Церкве похвало и радование;
радуйся, обители Саровския славо и удобрение.
Радуйся, преподобне Серафиме, Саровский чудотворче.

Кондак 6:

 Проповедует пустыня Саровская подвиги и труды твоя, богоносне угодниче Христов: дебри бо и леса ея молитвою облагоухал еси, пророку Божию Илии и Крестителю Господню Иоанну подражая, и явился еси пустыни прозябение многоплодное дарами Духа Святаго, Егоже действием многая и преславная совершил еси, подвизая верных воспевати благих Подателю Богу: Аллилуиа.

Икос 6:

 Возсия в тебе новый боговидец, Моисею подобный, Серафиме блаженне: непорочно бо служение олтарю Господню совершая, сподобился еси зрети Христа, во храме со Безплотными Силами грядуща. Сему Божию о тебе благоволению дивящеся, воспеваем ти сице:
Радуйся, боговидче преславный;
радуйся, Светом Трисиянным озаренный.
Радуйся, Пресвятыя Троицы служителю верный;
радуйся, Духа Святаго жилище украшенное.
Радуйся, Христа со Ангелы телесныма очима лицезревый;
радуйся, в бреннем телеси райскую сладость предвкусивый.
Радуйся, Хлебом Жизни насыщенный;
радуйся, питием безсмертия напоенный.
Радуйся, преподобне Серафиме, Саровский чудотворче.

Кондак 7:

 Хотя Человеколюбец Господь явити в тебе, преподобне, Свое неизреченное к людем милосердие, показа тя яко воистинну светило богосветлое: делы бо и словесы твоими всех приводил еси ко благочестию и любви Божией. Темже сиянием подвигов твоих просвещени и хлебом учения твоего насыщени, тебе усердно величаем и прославльшему тя Христу вопием: Аллилуиа.

Икос 7:
 
Новаго видяще тя избранника Божия, издалеча притекаху к тебе вернии в скорбех и болезнех; и сих, бедами отягченных, не отринул еси, источая целения, даруя утешение, предстательствуя в молитвах. Темже исхождаше во всю землю Российскую вещание чудес твоих, и сице тя славляху духовная чада твоя:
Радуйся, пастырю наш добрый;
радуйся, отче милостивый и кроткий.
Радуйся, врачу наш скорый и благодатный;
радуйся, немощей наших целителю милосердый.
Радуйся, в бедах и обстояниих помощниче скорый;
радуйся, душ смятенных умирителю пресладостный.
Радуйся, грядущая яко настоящая провидевый;
радуйся, прегрешений сокровенных обличителю прозорливый.
Радуйся, преподобне Серафиме, Саровский чудотворче.

Кондак 8:

 Странное чудо видим на тебе, преподобне: яко старец сый немощный и притрудный, тысящу дний и тысящу нощий на камени в молитве пребывал еси. Кто доволен изрещи болезни и борения твоя, блаженне отче, яже претерпел еси, воздея преподобнии руце твои к Богу, Амалика мысленнаго побеждая и Господеви поя: Аллилуиа.

Икос 8:

 Весь еси желание, весь сладость, Сладчайший Иисусе! — тако в молитвах взывал еси, отче, в пустыннем безмолвии твоем. Мы же, суетою помраченнии и во гресех все житие иждившии, восхваляюще любовь твою ко Господу, сице вопием ти:
Радуйся, любящим и чтущим тя ходатаю спасения;
радуйся, приводяй грешников ко исправлению.
Радуйся, молчальниче и затворниче предивный;
радуйся, молитвенниче о нас усердный.
Радуйся, пламенную любовь ко Господу показавый;
радуйся, огнем молитвы стрелы вражия попаливый.
Радуйся, свеще неугасимая, молитвою в пустыни пламенеющая;
радуйся, светильниче, горяй и светяй даровании духовными.
Радуйся, преподобне Серафиме, Саровский чудотворче.

Кондак 9:

 Все естество ангельское удивися странному зрению: старцу бо, сущу в затворе, Небесе и земли Царица явися, повелевающи, да открыет затвор свой и да не возбранит людем православным внити к себе, но да всех пети научит Христу Богу: Аллилуиа.

Икос 9:

 Ветии многовещаннии не возмогут изрещи крепость любве твоея, блаженне: предал бо еси себе на служение всем приходящим к тебе, повеление Богоматере исполняя, и был еси недоумевающим советник благий, унывающим утешитель, заблуждающихся кроткое вразумление, болящих врач и целитель. Сего ради вопием ти:
Радуйся, от мира в пустыню вселивыйся, да добродетели приобрящеши;
радуйся, из пустыни во обитель возвративыйся, во еже добродетели семена сеяти.
Радуйся, Духа Святаго благодатию осиянный;
радуйся, кротосте и смирения исполненный.
Радуйся, притекавшим к тебе отец чадолюбивый;
радуйся, в словесех любве ободрение и утешение им подававый.
Радуйся, приходящия к тебе радостию и сокровищем именовавый;
радуйся, за любовь твою святую радостей Небеснаго Царствия сподобивыйся.
Радуйся, преподобне Серафиме, Саровский чудотворче.

Кондак 10:

Спасительнаго твоего подвига, преподобне, достиг скончания, на молитве коленопреклоненно святую душу твою в руце Божии предал еси, юже Ангели святии вознесоша Горе ко Престолу Вседержителя, да со всеми святыми предстоиши во славе невечерней, воспевая песнь хвалебную святых Святейшему Слову: Аллилуиа.

Икос 10:

 Стена всем святым и иноком отрада, Пресвятая Дева пред кончиною твоею явися ти, провозвестивши близкое твое к Богу отшествие. Мы же, дивящеся таковому посещению Богоматере, вопием ти:
Радуйся, Небеси и земли Царицу лицезревый;
радуйся, явлением Божия Матере обрадованный.
Радуйся, весть от Нея преселению Небесному приемый;
радуйся, праведною кончиною святость жития твоего показавый.
Радуйся, в молитве пред иконою Богоматере умиленный дух твой Богу предавый;
радуйся, неболезненным исходом проречения твоя исполнивый.
Радуйся, венцем безсмертия от руки Вседержителя увенчанный;
радуйся, блаженство райское со всеми святыми, унаследовавый.
Радуйся, преподобне Серафиме, Саровский чудотворче.

Кондак 11:

 Пение непрестанное Пресвятей Троице вознося, преподобне, всем житием твоим подвижник великий благочестия явился еси, заблуждшим на вразумление, болящим душею и телом на исцеление. Мы же, благодарни суще Господеви за таковую милость Его к нам, выну зовем Ему: Аллилуиа.

Икос 11:

 Светоподательный светильник быв в житии, богоблаженне отче, и по смерти твоей возсиял еси яко светозарное светило Российския земли: источаеши бо от честных мощей твоих токи чудес всем, с верою и любовию к тебе притекающим. Темже мы, яко молитвеннику о нас теплому и чудотворцу, вопием ти:
Радуйся, множеством чудес от Господа прославленный;
радуйся, любовию твоею всему миру возсиявый.
Радуйся, любве Христовы верный последователю;
радуйся, утешение всем требующим твоея помощи.
Радуйся, источниче чудес неоскудеваемый;
радуйся, болящих и недужных исцелителю.
Радуйся, воды многоцелебныя кладязю неисчерпаемый;
радуйся, яко вся концы земли нашея любовию твоею объял еси.
Радуйся, преподобне Серафиме, Саровский чудотворче.

Кондак 12:

 Благодать и велие твое дерзновение пред Богом ведуще, тебе, преподобне отче, молимся: молися тепле ко Господу, да хранит Церковь Свою Святую от неверия и раскола, от бед и напастей, да поем тобою благодеющему нам Богу: Аллилуиа.

Икос 12:

 Поюще твое прославление, ублажаем тя, преподобне, яко многомощна молитвенника о нас пред Господом, утешителя и заступника, и с любовию возглашаем ти сице:
Радуйся, Церкве Православныя похвало;
радуйся, Отечеству нашему щит и ограждение.
Радуйся, путеводителю, всех к Небеси направляяй;
радуйся, защитниче наш и покровителю.
Радуйся, силою Божиею многая чудеса содеявый;
радуйся, ризою твоею многия недужныя исцеливый.
Радуйся, вся козни диавольския победивый;
радуйся, звери дикия кротостию твоею покоривый.
Радуйся, преподобне Серафиме, Саровский чудотворче.

Кондак 13:

 О предивный угодниче и великий чудотворче, преподобне отче Серафиме, приими малое сие моление наше, в похвалу тебе возносимое, и, предстоя ныне Престолу Царя царствующих, Господа нашего Иисуса Христа, молися о всех нас, да обрящем милосердие Его в День Судный, в радости поюще Ему: Аллилуиа.

Этот кондак читается трижды, затем 1-й икос и 1-й кондак.

Молитвы: 

Молитва первая:

О, пречудный отче Серафиме, великий Саровский Чудотоворче, всем прибегающим к тебе скоропослушный помощниче! Во дни земного жития твоего никто же от тебя тощь и неутешен отыде, но всем в сладость бысть видение лика твоего и благоуветливый глас словес твоих. К сим же и дар исцелений, дар прозрения, дар немощных душ врачевания обилен в тебе явился. Едва же призва тя Бог от земных трудов к небесному упокоению, николиже люби твоя преста от нас, и невозможно есть исчисляти чудеса твоя, умножившаяся, яко звезды небесныя; се бо по всем концом земли нашея людем Божиим явлешися даруеши им исцеление. Тем же и мы вопием ти: о, претихий и кроткий угодниче Божий, дерзновенный к нему молитвенниче, николиже призывающие тя отреваяй! Вознеси о нас благомощную твою молитву ко Господу сил, да дарует нам вся благопотребная в жизни сей и вся к душевному спасению полезная, да оградит нас от падений греховных и истинному покаянию да научит нас, во еже беспреткновенно внити нам в вечное Небесное Царство, идеже ты ныне в незаходимей сияеши славе, и тамо воспевати со всеми святыми Живоначальную Троицу во веки веков. Аминь.

Молитва вторая:

О великий угодниче Божий, преподобне и богоносне отче наш Серафиме! Призри от Горния славы на нас, смиренных и немощных, обремененных грехми многими, твоея помощи и утешения просящих. Приникни к нам благосердием твоим и помози нам заповеди Господни непорочно сохраняти, веру православную крепко содержати, покаяние во гресех наших усердно Богу приносити, во благочестии христианстем благодатно преуспевати и достойны быти твоего о нас молитвеннаго к Богу предстательства. Ей, святче Божий, услыши нас, молящихся тебе с верою и любовию, и не презри нас, требующих твоего заступления: ныне и в час кончины нашея помози нам и заступи нас молитвами твоими от злобных наветов диавольских, да не обладает нами тех сила, но да сподобимся помощию твоею наследовати блаженство обители райския. На тя бо упование наше ныне возлагаем, отче благосердый: буди нам воистинну ко спасению путевождь и приведи нас к невечернему свету Жизни Вечныя богоприятным предстательством твоим у Престола Пресвятыя Троицы, да славим и поем со всеми святыми достопокланяемое Имя Отца и Сына и Святаго Духа во веки веков. Аминь.

Молитва третья:

О преподобне отче Серафиме! Вознеси о нас, рабех Божиих (имена), благомощную твою молитву ко Господу сил, да дарует нам вся благопотребная в жизни сей и вся к душевному спасению полезная, да оградит нас от падений греховных и истинному покаянию да научит нас, во еже безпреткновенно внити нам в вечное Небесное Царство, идеже ты ныне в незаходимей сияеши славе, и тамо воспевати со всеми святыми Живоначальную Троицу во веки веков.